أصول الروشنة
المرجيحة
لسه بقف في البلكون
وأمسك في السور
واتخيل نفسي طفل صغنون
بيلعب ويتنطط
وماسك بالون كبير
ياخده ويطير
بعيد بعيد
في براح الكون
اركب مراجيح في الهوا
ادوخ وانسي الهموم
واعيش لحظه جنون
مأنا طفل صغنون
مايهموش عتاب ولا لوم
يفرح ويمرح
ويملي قلبه طاقه نور
حب وأمل
وينسى أي ألم جاله في يوم
يشوف الدنيا بكل لون
أخضر بلون الزرع
أزرق بلون البحر
أحمر بلون الورود
وتوعده المرجيحة
أنها هتستناه
كل يوم تاخده
وتعيشه في عالم تاني
لطيف
مليان هوا نقي وزهور
بالوان الطيف
يعيش اللحظة بلحظتها
ولا يهمه تفاصيل الكون
ماهو طفل صغنون
قلبه ابيض
وعقله خالي من الأوهام
حياته تبقي فضاااا واسع
من البهجه والسرور
ويفضل الوعد بينه وبين المرجيحة
يروحلها تعبان
يرجع وروحه مزهزهة
ويرجع عاشق حياته بجنان
