الفنون
سنة راحت وسنة جاية
قالت أنا في سن الأربعين
لكن عمري عشر سنين
طيب حسبتيها ازاي
قالت جمعت لحظاتي الحلوة
يوم خروجة حلوة
ويوم رقص وتنطيط
يوم لمة عيلة
فرح وزغاريط
كلمة غرام وحب
يوم عيد ولبس جديد
سبوع ووش مولود جديد
قالوا كل سنة بنكبر
وبينتهي العمر
ومفيش اي جديد
قالت العمر لحظات حلوة بنجمعها
وكل ما نجمع بتزيد لحظة
ونسيب الوجع بعيد
ونكتب في شهادة ميلادنا
كل لحظة حلوة بتعدي علينا
هي سنة من عمر جديد
قالوا السنة 365 يوم
قالت غلط!
احسبوها بأوقاتكم الحلوة
وما تفكروش كتير
سنة راحت وسنة جاية
فيها كنز كبير
لموا منها حلوكم وفرحكم
وجمعوهم
واكتبوا تاريخ في شهادة ميلاد
من جديد
تعالوا نجمع اللحظات السعيده
وندخل بيها سنة جاية
بأمنيات
ونعلق علي شجرة أحلامنا
كل إنجاز جديد
