قطار الزواج

السؤال هنا هل يوجد قطار للزواج؟

نعم يوجد تعبير إسمه قطار الزواج، وطبعا هو إختراع، لا يعلم أحد صاحبه، أو من المخترع العبقرى لهذه التسمية، الذى الحق مفهوم الزواج بالقطار.

هذا التعبير يستخدم على أي شخص تأخر زواجه عن السن المفروض من المجتمع: دى فاتها قطر الجواز! من ضمن الموروثات العجيبة التي توارثناها أباً عن جد، بالرغم من أنه  تعبير غريب اتربينا عليه وسمعناه كتير.

مامعنى فات القطار؟

طبعا المقصود به هو الفتاة التي لم تتزوج في سن العشرين – أو بالكثير 25؛ لأنهم بيعتبروها كبرت في السن، وإذا لم تتزوج قبل الثلاثين تبقى مصيبة! فلازم تلحق القطر! وبعدين هو تقريبا قطر واحد، يعنى مش مثلا فاتها القطر الأول، تآخد التانى!  يعنى حتى مش بيدوها فرصة تانية! لأ! هو قطار واحد للزواج، ملحقتش، تقعد في بيتها وتنتظر أى جوازة! يعنى أى قطر معدى تركبه وخلاص، رايح فين الله أعلم.

هل قطار الزواج للمرأة فقط؟

نعم. الغريب في الموضوع فعلاً، أن هذا القطار – ده معمول للست وبس، يعنى عمرى ما سمعت أي حد بيقول على راجل إن فاته قطار الزواج. ده تعبير مخصص للمرأة بس تقريبا، لكن الراجل ما شاء الله المحطة كلها تحت أمره! يركب القطر الأولانى وألا التانى، وينزل في المحطة اللى تعجبه براحته خالص .. يتجوز في أي وضع وأى سن وأى ظروف.

ماذا يحدث لمن فاته القطار؟؟

من عجائب وغرائب المجتمع بقى، إن الراجل إذا هو كمان عدى السن، وفاته القطر، العجيب إن ده  بيفضل إسمه عازب حتى لو عنده ستين سنة. لكن البنت بعد الثلاثين – بس كده – تبقى على خط الخطر، البنت هاتضيع كده! لازم تتجوز بأى شكل.

والأهل يجروا يجيبو لها عرسان أشكال وألوان، المناسب وغير المناسب؛ لأنها لازم تتجوز! وتلحق تجيب لها عيل لاحسن الناس تتكلم عليها وتآكل وشها! ويطلقوا عليها تسمية – أو تعبير أنا في رأيى أنه تعبير حقير جدا ولا يجب إطلاقا أنه يتقال – “عانس”!!

الحقيقة انا ماعرفش أصل التسمية دى إيه؟ أو بدأت إمتى في التاريخ، لكنها  تسمية بغيضة جدا ومهينة وفيها جرح لكرامة البنت. يعنى إيه الراجل يبقى اعزب والست عانس؟؟

مالراجل كمان اللى فاته قطر الجواز يقولوا عليه عانس! ليه اللقب ده حصرى للبنت بس؟؟؟

إذا كان معناه ان الشخص لم يتزوج، يبقى التسمية للرجل والمرأة على حد سواء. لكن إزاى؟؟؟

مجتمعنا بيحب يرفع من شأن الرجل، ويقلل من المرأة. وكرامة الراجل فوق كل شيء. يبقى لازم الراجل يفضل إسمه أعزب والبنت عانس.

الكلمة نفسها مؤذية جدا نفسيا، وبتخلى البنت تشعر بأنها أقل من غيرها، وإنها أدنى درجة من أي واحدة أصغر منها. وساعتها بتضطر إنها تقبل بأى عريس للهروب من اللقب ده، يعنى خوف من المجتمع مش أكتر. وتعيش تعيسة ومكسورة! ليه نجبر البنت بإنها ترضى بأى جوازة علشان محدش يقول عليها عانس؟

لازم نلغى كلمة قطار الزواج وكلمة عانس من قاموس اللغة، وكفى إهانة للمرأة ووضعها في إطار واحد فقط، وهو أنها خلقت للزواج والإنجاب ولا غير!! وإذا لم تتزوج أو تنجب أصبحت عانسا ويقلل الجميع من شأنها.