معايير الجمال
من ضمن الهزل فى المجتمع، معايير الجمال والتى تعتبر أيضا إختراع، حيث تتضمن معايير الجمال مواصفات محتلفة عبر العصور.
وهى اختراعات عربية، وبالأخص مصرية. ففى بعض الحقبات التاريخية، كان الرجال يحبون المرأة الممتلئة، أو بالمعنى العامى (المكلبظة). ويتقدم لها العرسان من كل مكان، وكانوا أيضا يفضلون السمراوات؛ لأن السمار نص الجمال. وفى بعض الأحيان يفضلون القصيرات.
أما الآن، فاقتصرت معايير الجمال فى البنت الرشيقة الطويلة، ويا سلام لو شقراء وعيونها ملونة. والرجل يقول “علشان نحسن النسل”، والمقلب إن الأولاد كلهم بيطلعوا شبهه هو، حتى لو متجوز ملكة جمال.
بالنسبة للرجل، فكان الرجل الأسمر فقط، ولايوجد معايير أخرى لإختياره. فالرجل على مر العصور جميل جمال ومالوش مثال … إذاً، فهذا الإختراع أيضا للمرأة فقط، وعندما يختار الرجل عروس الآن، يبدأ بالشكل: جميلة ورشيقة – تمام! ويبدأ في البحث عن باقى طلباته. فالعروس لازم تكون ست بيت، يعنى طباخة بريمو، ومتعلمة، وإجتماعية، ومرحة، ومثقفة، و…
من الآخر بتعرف تعمل كل حاجة .. ماهو هايتجوز بقى! لازم واحدة فيها كل المواصفات، وكمان ترحب بأهله – خصوصا أمه – وتفتح بيتها لزياراتهم فى أى وقت وتكون تحت أمر الست الوالدة.
طيب وهو … ولا أى حاجة من دى خالص! المهم هى تكون بهلوان كده ولهلوبة؛ لأن هى الست. هى اللى تربى العيال، وتودى للنادى والدروس، وتروح بيهم للدكتور، وهو تقريبا مشارك صامت فى المشروع.
نرجع للمعايير ..
فى يعض الأحيان الشاب بيختار بنت ويتقدم لها، ومن وجهة نظره فيها بعض العيوب والتى لاتناسب المعايير. فيعمل إيه؟ اللى يتجوز بنت مليانة يطلب منها تخس. واللى يآخد رفيعة قوى، عايزها تتخن. طيب اللى هايتجوز واحدة الطويلة، هايعمل معاها إيه؟ هايقصرها إزاى؟ واللى يتجوز واحدة مش محجبة يخليها تلبس الحجاب. ولو لابسة حجاب، عايز يلبسها النقاب حتى لو هو يعنى مش مواظب على الصلاة، لكن بس علشان الشكل الاجتماعى: أصل أختى وزوجة أخويا لابسينه .. المهم يغير فيها وخلاص .. غير منطقى بالمرة!!
كل ده كلام فاضى، ومفيش معايير ولا أى حاجة؛ لأن أى ست فى الدنيا لو إهتمت بنفسها ولبست شيك، ويكون اللبس مناسب لجسمها وشكلها، ووضعت بعض المساحيق، هاتكون جميلة!
لايوجد إمرأة قبيحة، ولكن يوجد إمرأة لاتعرف كيف تظهر جمالها! يبقى الرجالة ينسوا المعايير دى ويبحثوا عن زوجة بجد! ونس. ست جدعة تقف جنبهم فى حياتهم وتكون أم صالحة لأولادهم. إمرأة يستند إليها وقت الكبر. مش مجرد وجه جميل وجسد مبهر.
الجميلة بتكرمش زى غير الجميلة، والجسم بيتغير، يعنى دى مش معايير ثابتة إطلاقا! إنما هى أهواء وأصبحت من التراث، ويجب أن ننساها تماما ..
ونختار صح.
