ندى الجميلة والجزرة المفيدة
حكايتنا انهاردة عن ندى الجميلة اللى بابا وماما وكل أصحابها بيحبوها .
فى يوم من الأيام، بعد ماخلصت ندى كل الواجبات اللى وراها، وساعدت ماما كمان فى شغل البيت، قعدت ع الكنبة عشان ترتاح شوية، لكن عينيها راحت فى النوم.
حلمت ندى أنها بتلعب مع أصحابها فى بيت الأرنب الجميل، وقعدوا يجروا ويلعبوا ويضحكوا، وفجأة لاقوا جزرة كبيرة قوي، عمرهم ماشافوا جزرة بالحجم ده، حاولوا يقربوا منها ويمسكوها، لكن الجزرة الكبيرة جريت وراهم بالعصاية، عشان تخوفهم، وندى وأصحابها خافوا وقعدوا يجروا ويحاولوا ينادوا على أى حد يساعدهم.
وفى لحظة ظهر الأرنوب الجميل وضحك وقالهم: ماتخافوش دى الجزرة بتاعتى، وأنا جايبها عشان افطر واتغدى بيها.
وقالهم على فكره مش أنا بس اللى بأكله وبحبه. الجزر مفيد للكبار والصغار؛ لأن فوايده كتير.
سالت ندى الارنوب الجميل: طيب إيه فوايد الجزر؟
قال الأرنوب: بيقوى النظر، وبيحافظ على العقل، وكمان بيحافظ على جلد الإنسان ويخليه جميل.
وجات ماما تصحى ندى عشان ميعاد الغدا. بصت ندى لماما وقالت لها: فين طبق السلطة؟
ولما شافت ان ماما حطت الجزر مع الطماطم والخيار والفلفل، كانت مبسوطة، وقالت لماما: ايوة كده! طبق سلطة مفيد. وكمان عايزة أشرب عصير الجزر كل يوم؛ لأن الجزر بيقوى النظر، ويخلينا سراع الفهم.
