تغذية صحية بدون تمييز طبقي
مجال التغذية بقى عنيف قوي
كل واحد مقتنع تماماً إن هو اللي صح، ومتأكد من معلوماته مليون في المية، مع إن الدراسات ونتايجها بتتغير كل نص ساعة بدون مبالغة، وصعب جداً ندّعي إننا عارفين وفاهمين كل حاجة، وإلا حنكون اما (لا مؤخذة) أغبياء، أو بنكذب – لا سمح الله.
وفيه بعض الثوابت اللي مفيش (تقريباً) خلاف عليها:
- فوائد الخضار والفاكهة
- جسم الإنسان محتاج بروتين بكميات معينة
- الأكل المصنع له أضرار ويفضل التقليل منه
- يفضل نقلل جداً من السكر والدقيق الأبيض – أو نبطلهم خالص
- الحركة بركة – واشرب مية كتير.
ومن ناحية تانية، وبدون الدخول في تفاصيل، في الfad diets، والsuperfoods، والtrends. وهتلاقي ليها مؤيدين، مقتنعين بها وبيدافعوا عنها باستماتة، وهتلاقي كمان مهاجمين بيحاولوا يقنعوا المؤيدين إنهم مبيفهموش حاجة.
وفي النص بقى المواطن المصري العادي، اللي بيحاول يفهم علشان عايز يحافظ على صحته هو وأولاده ووالدته، اللي عندها سكر وضغط.
ده بقى، نعمله البحر طحينة، وندخله في متاهات إن الخضار كله مرشوش! لازم تجيب أورجانيك لاحسن يجيلك سرطان!
ايه ده! إنت ولادك مش بياكلوا لوز ليه؟ كده هيجيلهم سرطان!
بتاكل سمك مزارع؟ ده كده أكيد هيجيلك سرطان!
يقوم الراجل يحس إنه مفيش فايدة – كده كده أن كل أكلي غلط، والحاجات دي فوق امكانياتي. فما يحاولش يغير حاجة خالص، أو يبقى على طول متوتر ومتلخبط ومش عارف يبتدي منين ولا يعمل إيه.
يسروا ولا تعسروا يا جماعة!!
أرجوكم بجد – الناس تعبت!
لو إمكانياتك لا تسمح بالأورجانيك، اغسل الخضار والفاكهة العاديين بخل ومية كويس. حتى لو مرشوشين، أكيد هم أفيد لعيالك من المولتو والسكريات.
لو البروتين الوحيد اللي تقدر تجيبه سمك مزارع، متكترش منه بس، ودخل معاه بروتين نباتي.
لو مش حتقدر تجيب رز بني ومكرونة بالشوفان، جيب برغل وبطاطا. ولو مش قادر خالص، معلش، قلل الكميات واحدة واحدة وزود الخضار عشان تشبع.
الخلاف على مدى صحة أنواع الدهون المختلفة طلع نفسك منه، وخليك في زيت الزيتون على السلطة، واعمل الأكل بدهون قليلة أو من غير خالص.
لو أكلت برة أو حليت من نفسك كل فترة، مش مشكلة، طالما أكلك أغلب الوقت بتحاول يكون صحي.
شجعوا الناس تعمل اللي تقدر عليه عشان يحسوا إن الخطوة الصغيرة ممكن تعمل فرق كبير، بدل ما ييأسوا ويبطلوا محاولة من الإحباط.
