دبدوب الكسلان وألم الأسنان
حكايتنا انهارده عن الدبدوب اللى جسمه سمين والفرو الأبيض مغطيه ومخلى شكله جميل. دبدوب كان مشهور بين أصحابه بأنه كسول مابيحبش يتحرك كتير، زى أصحابه الكلب الذكى والقط الشقى، وكمان كان دبدوب الكسلان بيحب الاكل جدااا، وخصوصا الحلويات والسكر والشيكولاته، وماكانش بيغسل اسنانه – لاقبل النوم ولا الصبح لما بيصحى من النوم .
أصحابه الكلب الذكى والقط الشقى على طول بيحاولوا معاه انه يقلل من الحلويات الكتير، لأنها ممكن تسبب له امراض كتير، لكن الدبدوب الكسلان كان يضحك ويقول: مافيش حاجه تقدر تأثر عليه .
وفى يوم صحى الدبدوب من النوم على ألم فظيع فى اسنانه، وبقى مش قادر ينام ولاعارف ياكل ولا يلعب، وبسرعة راح مع أصحابه للأرنوب الجميل طبيب الأسنان، اللى اول ماشاف اسنانه قاله: فيه سنة مسوسة، ولازم تتخلع دلوقت حالااا! وباقى الاسنان لو محفظتش عليها، حتتخلع واحدة ورا التانية.
وفعلا، الأرنوب، دكتور الأسنان، خلع السنة وكتب له علاج، وقاله: أهم من العلاج، تحافظ على أسنانك.
وسال الدبدوب الكسلان أصحابه: أنتم ازاى محافظين على اسنانكم ؟
ضحك الكلب الذكى وقاله: ماباكلش حلويات خالص. ولو اكلت، باكل حتة صغننة. أما القط الشقى قاله: انا بغسل اسنانى كل يوم الصبح وبالليل.
بص الدب لأصحابه وقال: خلاص من انهاردة مش حاكل حلويات، وحاغسل أسنانى، عشان تبقى بيضا وجميله على طول.
