انا كنت خسيت عشرة كيلو بس رجعت زيدتهم تاني ….
بقالي شهرين مبطلة سكريات بس رجعتلها تاني!!!
كنت بروح الجيم كل يوم بس بطلت رياضة خالص ….
اي حد فينا جرب يغير عاداته الصحية مر بتجربة الانتكاس: اني اكون ماشية “كويس جدا” و فجأة ارجع تاني لعاداتي القديمة.
اغلب الناس بتتخض اما ده بيحصلها. وأول كلمة بيلوموا نفسهم بيها هي “الفشل”!
انا فشلت!!!
النتيجة اني الاقي نفسي في حالة فقدان امل وعزيمة.
اقوم حاسة ان بما إن محاولتي فشلت يبقي خلاص الدنيا بايظة بايظة ….
و مش لازم اعمل اي محاولة تانية دلوقتي لحد ما الاقي نوع جديد من الدايت او الانظمة و نبقي نبتدي علي نضافة. نقطة ومن أول السطر!!
و الموضوع يتكرر تاني. و ثالث. و رابع و .. و ..
مع ان لو رجعنا لللحظة اللي انتكسنا فيها و عرفنا في وقتها ان الانتكاسة دي مرحلة صحية و طبيعية في اي رحلة لتطوير الذات، هنطمن و نديها وقتها .
ساعتها هيكون اسهل مليون مرة اننا نكمل المسيرة بعد المطب الصغير ده، و هنفضل نطلع لقدام من غير ما نهد اللي وصلنا له بمجهودنا و صبرنا.
و قتها هنكون قربنا قوي من الهدف اللي عايزين نوصله و ساعتها مش هنخاف من الانتكاس تاني💪!!!
